Isda sa Himpapawid

Sa gabing sumikat ang araw

Binalot ng dilim ang liwanag

Hindi malaman ang dahilan

Sa mga pangyayaring ‘di maintindihan

Naririnig mo ba ang ingay sa tahimik na gabi?

Ang tinig ng mga pipi?

Ang sigaw ng mga isda sa karagatan?

At ang hangos ng ibon sa himpapawid?

Malaya sa loob ng rehas

Ngunit nakakulong sa labas

Tahimik silang sumigaw

At nag-ingay pagtigil ng alingawngaw

Ang ibong humahangos

Lumipad sa ilog na umaagos

Isdang minsang sumigaw karagatan

Ngayo’y lumalangoy sa himpapawid

Mga pakpak ay ginamit upang lumangoy

Buntot ay ginamit upang lumipad

Mga sigaw sa tahimik na gabi

Naging ingay sa mundong walang marinig

Naririnig mo ba ang tinig nila?

Nakikita mo ba ang kalagayan nila?

Mga mata’y ginamit upang makinig

Mga tenga’y ginamit upang makakita

Paano na ang tinig ng mga pipi?

Paano ang mga isda sa dagat?

Paano na sila?

Paano na?